پنجاب میں صحت کے شعبے کی کارکردگی بہتر بنانے کے لیے ہسپتال آف دی منتھ کا اقدام

تحریر و تحقیق ۔۔صالحہ کامران

پنجاب میں سرکاری ہسپتالوں کی کارکردگی کو بہتر بنانے اور مریضوں کو معیاری طبی سہولیات فراہم کرنے کے لیے ہسپتال آف دی منتھ کا اعزاز دینے کا اعلان کیا گیا ہے۔ اس اقدام کا مقصد بہترین کارکردگی کا مظاہرہ کرنے والے ہسپتالوں کی حوصلہ افزائی کرنا اور صحت کے شعبے میں بہتری کے عمل کو فروغ دینا ہے۔

وزیراعلیٰ پنجاب مریم نواز شریف کی جانب سے صحت کے شعبے میں بہتری اور عوام کو بہتر طبی سہولیات کی فراہمی پر خصوصی توجہ دی جا رہی ہے۔ اس سلسلے میں ہسپتالوں کی کارکردگی کا جائزہ لے کر نمایاں کارکردگی دکھانے والے اداروں کو ماہانہ بنیادوں پر اعزاز سے نوازنے کا تصور پیش کیا گیا ہے۔
وزیراعلیٰ پنجاب مریم نواز شریف نے 25 ستمبر 2026 کو منعقدہ ویڈیو لنک اجلاس میں صوبے کے بہترین کارکردگی دکھانے والے ہسپتالوں کو ماہانہ بنیادوں پر ’’ہسپتال آف دی منتھ‘‘ کا اعزاز دینے کا اعلان کیا۔ اس اقدام کے ذریعے ہسپتالوں میں علاج معالجے کے معیار اور مریضوں کو فراہم کی جانے والی سہولیات کو بہتر بنانے پر توجہ دی جائے گی۔

اجلاس میں پنجاب کے 300 مریم نواز ہسپتالوں، جو پہلے دیہی مراکز صحت (Rural Health Centres) کہلاتے تھے، کو مکمل ہسپتالوں میں تبدیل کرنے کا فیصلہ بھی کیا گیا۔ اس منصوبے کا مقصد دیہی علاقوں میں علاج اور تشخیصی سہولیات تک رسائی کو بہتر بنانا ہے۔

اجلاس میں بتایا گیا کہ پنجاب میں 911 کلینک آن وہیلز کے ذریعے مختصر عرصے میں تقریباً 3 کروڑ مریضوں کو طبی سہولیات فراہم کی جا چکی ہیں۔اس کے علاوہ کلینک آن وہیلز کے لیے ڈیجیٹل میڈیکل باکس متعارف کرانے کا فیصلہ کیا گیا ہے، جس کے ذریعے الٹراساؤنڈ، بلڈ شوگر، سی بی سی اور ای سی جی جیسے ٹیسٹ کیے جا سکیں گے۔ موبائل فون سے منسلک اسمارٹ الٹراساؤنڈ ڈیوائس بھی متعارف کرانے کا منصوبہ ہے۔

وزیراعلیٰ پنجاب نے صوبے کے ہسپتالوں میں 40 ہزار ڈاکٹروں اور دیگر طبی عملے کی بھرتی کی ہدایت بھی کی۔ اجلاس میں بتایا گیا کہ پہلے ہی ہزاروں ڈاکٹرز، ویمن میڈیکل آفیسرز، کنسلٹنٹس اور دیگر طبی عملہ تعینات کیا جا چکا ہے۔

ہر ضلع میں نئی سی ٹی اسکین مشین فراہم کرنے اور عام و موسمی بیماریوں کے علاج کے لیے ٹیلی میڈیسن مراکز قائم کرنے کی ہدایات بھی دی گئیں۔ ان مراکز میں مریض ویڈیو کال کے ذریعے ڈاکٹروں سے مشورہ کر سکیں گے۔

ہسپتالوں میں علاج کے معیار کا جائزہ لینے کے لیے کلینک کوالٹی کنٹرول افسران کی تعیناتی اور بنیادی صحت کے مراکز میں 24 گھنٹے ڈیجیٹل مانیٹرنگ کے نظام کو بھی اہمیت دی گئی ہے۔اس کے ساتھ ضلعی اور تحصیل ہیڈکوارٹر ہسپتالوں میں صفائی اور پارکنگ کی سہولیات بہتر بنانے کی ہدایات بھی جاری کی گئیں۔

ہسپتال آف دی منتھ کا اعزاز پنجاب کے سرکاری ہسپتالوں میں کارکردگی کی حوصلہ افزائی کے لیے متعارف کرایا گیا ہے۔ اس اقدام کے ساتھ دیہی مراکز صحت کی اپ گریڈیشن، طبی عملے کی بھرتی، ڈیجیٹل طبی سہولیات اور ہسپتالوں کی نگرانی کے منصوبے بھی شامل ہیں۔ ان اقدامات کے عملی نتائج کا اندازہ مریضوں کو ملنے والی سہولیات، علاج کے معیار اور ہسپتالوں کی کارکردگی میں ہونے والی بہتری سے لگایا جا سکے گا۔