یو ایم ٹی اور لاہور قلندرز کے درمیان تین سالہ معاہدہ، نوجوان کرکٹرز کے لیے تعلیم اور تربیت کے نئے مواقع

تحریر و تحقیق ۔۔صالحہ کامران

لاہور: یونیورسٹی آف مینجمنٹ اینڈ ٹیکنالوجی (یو ایم ٹی) اور پاکستان سپر لیگ کی معروف ٹیم لاہور قلندرز کے درمیان نوجوان کرکٹرز کی صلاحیتوں کو نکھارنے، اعلیٰ تعلیم کے مواقع فراہم کرنے اور کھیلوں کے فروغ کے لیے تین سالہ معاہدہ طے پا گیا ہے۔
اس معاہدے کا مقصد نوجوان کھلاڑیوں کو کرکٹ کے ساتھ ساتھ تعلیم اور پیشہ ورانہ تربیت کے مواقع فراہم کرنا ہے تاکہ وہ کھیل کے میدان میں اپنی صلاحیتوں کو بہتر بنانے کے ساتھ تعلیمی میدان میں بھی آگے بڑھ سکیں۔

معاہدے پر یو ایم ٹی کے صدر ابراہیم مراد اور لاہور قلندرز کے چیف ایگزیکٹو آفیسر عاطف رانا نے دستخط کیے۔معاہدے کے تحت لاہور قلندرز باصلاحیت نوجوان کرکٹرز کی شناخت کرکے انہیں یو ایم ٹی میں داخلے اور اسکالرشپس کے لیے نامزد کرے گی۔ اہل کھلاڑیوں کو یونیورسٹی کی پالیسی کے مطابق اسکالرشپس اور دیگر تعلیمی سہولیات فراہم کی جائیں گی۔

اس شراکت داری کے تحت دونوں ادارے مشترکہ تربیتی سیشنز، کوچنگ کلینکس، ٹیلنٹ ڈویلپمنٹ پروگرامز اور دوستانہ کرکٹ میچز کا انعقاد کریں گے۔یو ایم ٹی کی کرکٹ ٹیم کے کھلاڑیوں کو لاہور قلندرز کے ہائی پرفارمنس سینٹر میں خصوصی تربیت حاصل کرنے کے مواقع بھی فراہم کیے جائیں گے، جہاں وہ اپنی کرکٹ کی مہارتوں کو بہتر بنا سکیں گے۔

یو ایم ٹی کے صدر ابراہیم مراد نے کہا کہ یونیورسٹی باصلاحیت کھلاڑیوں کو تعلیم کے ذریعے بہتر مستقبل کی طرف لے جانے کے لیے پرعزم ہے۔ ان کے مطابق تعلیم یافتہ کھلاڑی بین الاقوامی سطح پر پاکستان کی نمائندگی میں اہم کردار ادا کر سکتے ہیں۔لاہور قلندرز کے سی ای او عاطف رانا نے بھی اس شراکت داری کو نوجوان کھلاڑیوں کے لیے ایک نیا موقع قرار دیا اور کہا کہ کھلاڑیوں کو تعلیم کے ساتھ عملی مہارتیں فراہم کرنا بھی اہم ہے۔

یو ایم ٹی اور لاہور قلندرز کے درمیان یہ تین سالہ معاہدہ نوجوان کرکٹرز کو اعلیٰ تعلیم، پیشہ ورانہ کوچنگ اور کھیلوں کی تربیت کے مواقع فراہم کرنے کی مشترکہ کوشش ہے۔ اس اقدام کے ذریعے نوجوان کھلاڑی اپنی تعلیمی سرگرمیوں کو جاری رکھتے ہوئے کرکٹ میں بھی آگے بڑھنے کے مواقع حاصل کر سکیں گے۔
معاہدے کے تحت اسکالرشپس اور دیگر سہولیات کے لیے یونیورسٹی کی مقرر کردہ پالیسیوں اور اہلیت کے معیار پر عمل کیا جائے گا۔